Britania e Madhe do të dëportojë 200 kriminelët më të rrezikshëm shqiptarë

200 kriminelët më të rrezikshëm të Shqipërisë do të deportohen nga Britania e Madhe për të vuajtur pjesën tjetër të dënimit të tyre me burg në burgjet shqiptare.

Mediat britanike raportojnë se ky vendim vjen pas një marrëveshjeje shumëmilionëshe të paguar nga Mbretëria e Bashkuar.

Shtatëmbëdhjetë “të dënuar me burgim të përjetshëm ” përfshirë vrasësin e mësueses Sabina Nessa janë të parët nga 200 vrasësit dhe komandantët e bandave të drogës që do të deportohen për të vuajtur dekadat e mbetura të dënimit në burgjet shqiptare.

Koci Selamaj u dënua me burgim të përjetshëm por që iu konvertua në një dënim minimal prej 36 vitesh për rrahjen dhe mbytjen e Sabinës në një park në juglindje të Londrës.

Ai deri më tani ka vuajtur vetëm dy vjet, që do të thotë që Britania e Madhe do të paguajë shqiptarët për ta mbajtur në burg për 34 vitet e mbetura të dënimit.

Kostoja e mbajtjes së Selamajt për 34 vite të tjera në burg do të ishte 57,000 paund në vit në një burg të sigurisë së lartë në Mbretërinë e Bashkuar, në total 1.9 milionë paund. Ndërkohë që në Shqipëri kjo mund të jetë deri në 10,000 £ në vit.

Sipas një marrëveshjeje të veçantë, kriminelët shqiptarë gjithashtu lirohen deri në një vit më herët nga dënimet e tyre me burg dhe u jepen grante prej 1,500 paund nëse pranojnë të deportohen dhe të mos kthehen më në Mbretërinë e Bashkuar. Vetëm shqiptarët e burgosur për më shumë se katër vjet do të kenë të drejtë për skemën e transferimit të burgut, e cila bazohet në një marrëveshje që hyri në fuqi majin e kaluar.

Mes të dënuarve me burgim të përjetshëm që do deportohen në Shqipëri janë edhe dy hajdutë shqiptarë që vranë një 21-vjeçar në tentativë për të vjedhur drogën, një shqiptar që vrau një çift të moshuarish dhe një tjetër që vrau një shpërndarës droge.