Dejvis Rustemaj,dënuar më parë për vjedhje me dhunë, kanosje, plagosje dhe armëmbajtje pa leje

Përditësuar më 6 August 2017, 14:48

Atentatori tek Komuna e Parisit, njeriu që kërcënoi për borxhin e të dashurës dhe mori plumbin në pulpë

Nuk është emër i panjohur për Policinë e Shtetit, Dejvis Rustemaj, i arrestuari në Vlorë për atentatin e 3 gushtit ndaj Mariglen Hoxhës tek “Komuna e Parisit”. Ai është dënuar më parë për vjedhje me dhunë, kanosje, plagosje dhe armëmbajtje pa leje dhe ka një dosje të trashë në Policinë e Shtetit.

Rustemaj ka kanosur me armë djalin e një biznesmeni në 20 shtator 2015, në rrugën “Mine Peza”, pasi pretendonte se ai i kishte 15 mijë euro borxh, të dashurës së tij. Djali i biznesmenit të njohur, Ilias Fishekut, e ka denoncuar në Polici, Rustemaj, për këtë ngjarje.

Mësohet se pas kësaj Rustemaj u dënua.

Por, në maj të këtij viti, Dejvi Rustemaj sërish ka përfunduar në kronikat e policisë. Ndaj tij u bë atentat ndërsa ishte në një bilardo në Kinostudio dhe u plagos në këmbë nga dy persona të maskuar me motor që tentuan ta vrisnin, sipas tij. Policia shpalli në kërkim një 31-vjeçar për atentatin.

Rustemaj, sot me pranga, pritet të japë dëshminë se cilat qenë arsyet që e shtynë të tentonte të ekzekutonte Mariglen (Lorenc) Hoxhën.

FOTO/ Organizatori i vrasjes tek ‘Komuna e Parisit, në krah të ekzekutorit
Zbulohet fotoja e organizatorit të dytë të atentatit te “Komuna e Parisit”, ku mbeti i plagosur Mariglen (Lorenc) Hoxha.

Ai është Klajdi Kodra, person i dënuar më parë me burg për një ngjarje në vitin e shkuar. Kodra ishte i lirë, edhe pse në gusht të 2016 plagosi dy vëllezër po te “Komuna e Parisit” për një borxh, shkruan panorama. Bëhet fjalë për Flamur Cullajn dhe vëllanë e tij. Me sa duket, Kodra është i forti i “Komunës së Parisit”, pasi një vit më vonë u bë sërish protagonist, së bashku me Dejvi Rusmeajn.

Gjithashtu, Kodra është plagosur edhe në vitin 2013, gjatë një konflikti te “Komuna e Parisit” si edhe është arrestuar mbi pesë herë nga Policia për vepra të ndryshme penale.