E tmerrshme! QSUT nis terapitë hormonale për transgjinorët

Një vendim që pritet të ndezë debat të fortë publik është marrë në sistemin shëndetësor shqiptar. Qendra Spitalore Universitare “Nënë Tereza” ka hapur zyrtarisht rrugën për aplikimin e terapive hormonale për personat transgjinorë, një praktikë që deri më tani kryhej jashtë vendit ose në mënyrë informale.

Ky zhvillim është formalizuar përmes një urdhri të Ministrisë së Shëndetësisë dhe Mbrojtjes Sociale, i cili përcakton rregullat dhe procedurat për ndjekjen e këtij trajtimi në spitalet publike. Për herë të parë, ky proces do të mbulohet nga fondet e sigurimeve shëndetësore, duke e bërë të aksesueshëm për pacientët brenda vendit.

Deri më sot, mungesa e një kuadri të tillë kishte detyruar shumë individë të kërkonin trajtim në klinika jashtë Shqipërisë, kryesisht në vendet e rajonit, me kosto të larta financiare. Ndërkohë, raste të tjera i drejtoheshin rrugëve të pakontrolluara, duke marrë medikamente pa mbikëqyrje mjekësore dhe duke rrezikuar seriozisht shëndetin.

Sipas rregullores së re, trajtimi do të kryhet në shërbimin e endokrinologjisë në QSUT. Terapia përfshin përdorimin e testosteronit për burrat transgjinorë, si dhe estrogjen dhe anti-androgjenë për gratë transgjinore.

Një nga pikat më të diskutueshme mbetet mosha e nisjes së trajtimit. Protokolli parashikon që terapia mund të fillojë nga mosha 16 vjeç me miratimin e prindërve, por në raste të veçanta, pas një vlerësimi të thelluar, mund të konsiderohet edhe për adoleshentë më të vegjël.

Para nisjes së trajtimit, pacientët do t’i nënshtrohen një procesi të detajuar vlerësimi mjekësor dhe psikologjik, si dhe do të firmosin pëlqimin e informuar për efektet e mundshme afatgjata, përfshirë ndikimin në fertilitet.

Gjatë gjithë trajtimit, mjekët do të kryejnë monitorime të vazhdueshme për të shmangur rreziqet shëndetësore, si problemet kardiovaskulare apo çrregullimet metabolike.

Ky vendim shënon një ndryshim të madh në qasjen e sistemit publik ndaj kësaj kategorie pacientësh dhe pritet të shoqërohet me reagime të forta në opinionin publik.