Erdogan nuk takon presidentin Meta

Mes aktiviteteve të shumta të presidentit, ajo që bie në sy është mungesa e një takimi të Erdogan me homologun e tij shqiptarë, presidentin Ilir Meta.

Sipas protokolleve shtetërore të dy vendeve gjatë vizitave zyrtare të presidentëve, një takim me homologun mikë-pritës është i padiskutueshëm, përveçse në rasteve të jashtëzakonshme.

Por ashtu si shumë shtetarë dhe zyrtarë të tjerë të lartë ndërkombëtarë kohët e fundit, edhe Erdogan e ka shmangur takimin me Ilir Metën.

Mediat pranë tij e kanë komentuar këtë fakt si një hakmarrje të Edi Ramës, por kushdo që njeh sado pak protokollet e vizitave zyrtare të këtij niveli, e di shumë mirë që axhenda përcaktohet nga një grup i përbashkët dhe prioritet janë kërkesat e bujtësit, në këtë rast të presidentit Erdogan.

Pra duket qartë që ai ka shmangur një takim me presidentin e Shqipërisë, dhe një nga arsyet përveç “bllokadës amerikane” mund të jetë edhe marrëdhënia e ngrirë që Meta ka me mikun e tij Edi Rama.

Dhe pikërisht ndërkohë që Erdogan po zbriste në Rinas dhe axhenda e takimeve të tij konfirmon se nuk do të ketë qoftë edhe një takim kortezie me Ilir Metën, ky i fundit ka nxituar që të hedhë thumba “hakmarrëse” në faqen e tij në Facebook, duke shfrytëzuar përvjetorin e vdekjes së Gjergj Kastriot Skënderbeut.

“Kryeheroi ynë Kombëtar, Gjergj Kastrioti Skënderbeu, krenaria dhe fuqia, trimëria dhe guximi, frymëzimi dhe lavdia jonë e çdo epoke, do të mbetet përjetë shqiptari më i gjallë ndër nesh!

Vepra e pavdekshme e simbolit më përbashkues, që përcaktoi përkatësinë tonë europiane do të na udhëheqë gjithmonë në çdo përpjekje për liri, sovranitet dhe dinjitet kombëtar,” shkruan Meta duke e shoqëruar këtë shënim edhe me një video.