Fragmentarizimi i opozitës është fitorja më e madhe e kryeministrit Rama

Ermal Mulosmani

Fragmentarizimi i opozitës është fitorja më e madhe e pushtetit. Nëse armiku më i madh i një grupimi opozitar është një tjetër grupim opozitar, njëri prej tyre, ose të dy së bashku, po bëjnë lojën e pushtetit.

Unë do shkoj pro atij fraksioni opozitar që fokus të goditjes dhe propagandës së tij ka strumbullarin e pushtetit, pra Edi Ramën.
Do bëj çmos të promovoj lëvizjet e reja prej të cilave më simpatikja më duket kjo e Lapajt. Përtej problemeve të qarta në diskurs, Adriatik Lapaj më duket më i qarti në atë çka kërkon, në artikulimin e tezave politike dhe kritikën ndaj pushtetit.
Nëse nuk mbështesim të renë do mbesim gjithmonë me të vjetrën.

Aksioni i parë politik i Lapajt duhet të jetë ndryshimi i Kodit Zgjedhor- kalimi në proporcional të pastër me lista shumëemërore ku mandatin e deputetit e marrin kandidatët më të votuar. Kjo do të jepte një arsye për shpresë. Me këtë sistem zgjedhor Rama mundet të shpallet kur të dojë monark i vendit. Nuk ka kohë për të pritur. Janë vetëm 20 muaj për zgjedhjet e 2025. Po nuk filloi presioni tani ndaj Ramës do jetë shumë e vështirë. Në nismën për sistem proporcional nacional me lista të hapura të gjitha fraksionet duhet të bëhen bashkë.