Fundi i karrierës politike të Erion Veliajt?!

Erion Veliaj, dikur një nga figurat kryesore dhe më të privilegjuara të “Rilindjes” së Edi Ramës, duket se po shkon drejt një fundi të pashmangshëm politik. Një seri skandalesh korruptive, përfshirë inceneratorin e Tiranës dhe skemën e famshme “5D”, kanë vënë në pikëpyetje jo vetëm integritetin e tij, por edhe mbijetesën e tij politike.

Afera “5D”, e cilësuar si një nga skemat më spektakolare të zhvatjes së taksave të qytetarëve, thuhet se ka shokuar edhe vetë kryeministrin Edi Rama, duke e detyruar këtë të fundit të marrë masa drastike për të larguar Veliajn nga skena politike. Burimet flasin për një vendim të “prerë” për dorëzimin e Veliajt para drejtësisë, një hap që pritet të realizohet para zgjedhjeve të 2025-ës.

Në këtë skenar, Veliaj duket se po përpiqet të mbrojë veten përmes rrjeteve të tij në gjykatë, por gjurmët e skemave korruptive dhe hetimet mbi pasurinë e tij dhe të bashkëshortes Ajola Xoxa e bëjnë të pamundur shmangien e përballjes me ligjin.

Ndërkohë, për të shmangur dëmin elektoral që Veliaj mund të shkaktojë në Tiranë, Rama duket se ka vendosur të ristrukturojë ekipin drejtues të qarkut. Sipas raportimeve, Elisa Spiropali, Ogerta Manastirliu dhe Blendi Gonxhe pritet të marrin përgjegjësi të reja për drejtimin e fushatës, me theks të veçantë në zonën e Kombinatit.

Pavarësisht përpjekjeve për të fuqizuar fushatën socialiste në Tiranë, prania e Veliajt në skenën politike mbetet një njollë që vështirë se mund të pastrohet. Hetimet dhe faktet që po dalin në dritë tregojnë një histori të korrupsionit brutal, që jo vetëm ka dëmtuar qytetin e Tiranës, por ka thelluar edhe krizën e besimit tek qytetarët.

Nëse fundi i Veliajt vërtet përkthehet në një ndëshkim ligjor dhe moral, kjo do të ishte një ngjarje historike për politikën shqiptare, që prej dekadash ka parë eksponentë të tillë të shpëtojnë pa pasoja. Por nëse gjykatat vijojnë të heshtin, atëherë do të mbetet edhe një herë e qartë: drejtësia në Shqipëri është gjithmonë e gatshme të mbrojë të fuqishmit, edhe kur qytetarët paguajnë çmimin e lartë të korrupsionit.