Videot në flagrancë, jo gjithmonë të mbyllin karrierën politike- thotë ky shkrim i gazetës Die Presse.

Plotësisht dakort me konkluzionin.

Por, ajo çfarë thotë shkrimi është se si Rama, në dallim nga Kurz e pranoi koalicionin me Metën. Dhe jo vetëm aq, por e bëri dhe President…

Pra, standartin perëndimor që më së fundi na e solli në vemendje Kurz, nuk e pranon gjëkundi Rama.

Kurz u nda nga problemi, Rama lutet të bashkohet dhe jeton me të…

Kur dështon me “problemin politik” Meta, bëhet me “krye-problemin elektoral” Niçe…

Për dorëheqje e zgjedhje të parakohshme, as se çon nëpër mend./ Ylli Manjani

’Videot flagrante nuk sjellin gjithmonë fundin e karrierave politike”, media austriake ‘’godet’’ Shqipërinë: Meta, Rama dhe 700 mijë eurot

Ndërsa Austria po shkon drejt zgjedhjeve të parakohshme, pas videoskandalit ku zv.kryeministri Heinz-Christian Strache, i premtonte marrëveshje mbesës së një oligarku rus, duket se në Europë ka nisur një tjetër betejë, ajo e luftës kundër të djathtës ekstreme.

Në një kohë kur kancelari Sebastian Kurz, shpalli zgjedhjet e parakohshme, padyshim që shumë prej shqiptarëve paralelizojnë situatën me Shqipërinë, ku prej kohësh palët politike e kanë çuar vendin drejt një krize, e ku përgjime të shumta kanë dalë në media, por që për qeverinë Rama dhe për prokurorinë nuk mund të konsiderohen prova.

Ndërkohë një shkrim tejet intersant është publikuar në median e njohur austriake ”Die Presse”, me titull ‘’Jo gjithmonë videot flagrante çojnë në shkatërrimin e karrierës politike”, duke marrë shembullin e presidentit të Shqipërisë Ilir Meta, dhe videopërgjimit që iu publikua nga ish-ministri i Energjitikës Dritan Prifti.

Në shkrimin e medias austriake thuhet se video e Metës tregonte për një aparat qeveritar të kapur në marrëveshje korruptive, po që përgjimi nuk u pranua kurrë si dëshmi.

“Meta, i cili fillimisht kishte dhënë dorëheqjen nga posti i tij pasi video u bë publike, u lirua më pas nga akuzat në gjykatë. Duke qenë se ai drejtonte një parti që gjendej mes dy partive më të mëdha në vend, ai u kthye sërish në pozita drejtuese si kryetar Kuvendi dhe si President i shqiptarëve.

Video doli në dritë në fillim të vitit 2011. Ajo tregon ministrin e jashtëm dhe zëvendëskryeministrin që diskutojnë për një rryshfet prej 700,000 eurosh, për të dhënë kontratën për një tender për një hidrocentral”,thuhet mes të tjerave në shkrimin e ‘’Die Presse”.

Media thekson faktin se vetë Edi Rama, i gjendur në një situatë të vështirë, në 2013, i ka kërkuar Metës ndihmë, në mënyrë që të fitonte shumicën në Kuvend.

“Në klimën politike të tensionuar të shqiptarëve, video menjëherë ngjalli zemërimin e masave. Katër protestues u qëlluan për vdekje. Meta i mbijetoi stuhisë politike dhe ligjore pas tërheqjes së tij strategjike. Më kot, prokurori kërkoi dy vjet burg, pasi gjykata nuk e pranoi. 

Në vitin 2013 socialistët kishin nevojë për një partner koalicioni. Shefi i saj Edi Rama iu drejtua për ndihmë Metës dhe partisë së tij LSI. Aleanca vazhdon sot, dhe Meta përparoi në numrin një në shtet. Më pas u tha se Prifti e kishte montuar vetë videon dhe e kishte nxjerrë në media në shenjë hakmarrje ndaj Metës, që e shkarkoi nga posti i ministrit së ekonomisë”, përfundon shkrimin media austriake.