Groenlanda përçan Perëndimin, SHBA ‘plas’ tarifat drejt BE-së

Presidenti i Shteteve të Bashkuara, Donald Trump, ka njoftuar vendosjen e tarifave të reja tregtare ndaj disa vendeve që eksportojnë mallra në tregun amerikan, masa që pritet të hyjnë në fuqi më 1 shkurt.

Sipas deklaratës së tij, këto tarifa do të qëndrojnë në fuqi deri në momentin kur, siç u shpreh Trump, të arrihet një marrëveshje për “blerjen e plotë dhe totale të Grenlandës” nga Shtetet e Bashkuara.

Në një postim në rrjetin social Truth Social, Trump bëri të ditur se vende si Danimarka, Norvegjia, Suedia, Franca, Gjermania, Mbretëria e Bashkuar, Holanda dhe Finlanda do të përballen fillimisht me një tarifë prej 10% për të gjitha mallrat që eksportojnë drejt SHBA-së.

Ai shtoi se duke nisur nga 1 qershori, kjo tarifë do të rritet ndjeshëm, duke arritur në 25%.

Tarifat përfaqësojnë taksa mbi mallrat e importuara dhe, në praktikë, paguhen nga kompanitë që importojnë produkte të huaja në SHBA, duke ndikuar drejtpërdrejt në koston e tregtisë dhe çmimet përfundimtare në treg.