Identifikohet autori që qëlloi 27-vjeçari në Fresk me plumb në bark

Një ngjarje e rëndë me armë zjarri ka tronditur mbrëmjen e djeshme zonën e Freskut në Tiranë, ku 27-vjeçari Juglen Abazi ka mbetur i plagosur me armë zjarri teksa ndodhej brenda automjetit të tij.

Ngjarja ka ndodhur rreth orës 19:00, dhe sipas burimeve, Abazi është qëlluar me armë në bark ndërsa ndodhej në mjetin e tij në lëvizje. Pavarësisht plagës së rëndë, ai është vetëparaqitur në spital në orën 19:10, ku ndodhet nën kujdesin e mjekëve. Gjendja e tij shëndetësore nuk është bërë ende publike.

Hetimi në vijim

Sot janë zbuluar detaje të reja rreth atentatit. Sipas burimeve nga grupi hetimor, autori ka qëlluar nga një distancë e afërt, duke qenë në këmbë pranë automjetit, dhe është larguar menjëherë nga vendi i ngjarjes.

Policia ka identifikuar autorin e dyshuar të plagosjes si Klejvis Caka, i njohur ndryshe edhe me mbiemrin Lusha, i cili është shpallur në kërkim. Po ashtu, është arrestuar një nga bashkëpunëtorët e tij, Xhonatan Qerimi, ndërsa në kërkim është shpallur edhe Andi Gurra, i dyshuar për ndihmë në arratisjen e autorit menjëherë pas ngjarjes.

Kamerat e sigurisë dhe dëshmitarët

Grupi hetimor ka sekuestruar pamjet e kamerave të sigurisë pranë vendit të ngjarjes dhe ka marrë në pyetje dëshmitarë, për të ndriçuar motivet që çuan në atentatin ndaj 27-vjeçarit.

Megjithatë, vetë i plagosuri, Juglen Abazi, ka dhënë dëshmi kontradiktore, duke mos ofruar ende një deklaratë të plotë para hetuesve. Kjo ka vështirësuar zbardhjen e menjëhershme të rrethanave.