Juristi Ylli Manjani e quan   vendimin pa vendim të Kushtetueses

Juristit Ylli Manjani thotë se vendimi i djeshëm i Gjykatës Kushtetuese – më saktë mungesa e një vendimi – është simptomë e një krize më të thellë institucionale.

Së pari, gjykimi kushtetues është ndër proceset më serioze që ndodhin në një republikë kushtetuese. Ai është themeli i balancës së pushteteve. Kur serioziteti dhe koherenca mungojnë në vendimmarrje, atëherë cenohet vetë besimi publik tek institucioni. Mungesa e qëndrueshmërisë në arsyetim dhe bllokimi i vendimeve krijojnë perceptimin e mungesës së integritetit profesional.

Së dyti, një Gjykatë Kushtetuese e paplotë në numër është një problem institucional, jo teknik. Numri tek i anëtarëve është konceptuar pikërisht për të shmangur barazimet dhe bllokimet. Kur për një kohë të gjatë trupa mbetet e paplotësuar, vendimmarrja kthehet në rastësi dhe jo në funksionim normal. Kjo është papërgjegjshmëri shtetërore.

Së treti, vendimmarrjet nuk duhet të varen nga raportet personale mes individëve. Drejtësia kushtetuese duhet të bazohet në parime dhe interpretim juridik, jo në mllefe apo përplasje personale. Kur perceptimi publik anon drejt kësaj të fundit, kemi një alarm institucional.

Së katërti, në fund të ditës, zgjidhjet reale në këtë vend vijnë nga politika dhe Parlamenti. Drejtësia duhet të jetë e pavarur, por mbi të gjitha duhet të jetë e paanëshme. Sfida e radhës nuk është thjesht funksionimi formal i Gjykatës, por ndërtimi i një gjykate që perceptohet si e drejtë dhe e ekuilibruar.

Së fundi, teoritë konspirative apo narrativat e ndërtuara për konsum mediatik nuk e zgjidhin problemin. Ato vetëm mbushin hapësirën publike me zhurmë, ndërsa thelbi mbetet i pandryshuar: një institucion kyç i republikës po jep sinjale bllokimi.

Në një shtet kushtetues, “vendimi pa vendim” është gjithmonë një mesazh. Dhe ky mesazh kërkon reflektim serioz.