Ky është deputeti Robert Bitri që votoi per Vangjel Tavon

Kreu i grupit Parlamentar të Partisë Socialiste, Taulant Balla, në seancën e sotme parlamentare në Kuvend ka justifikuar rastin e votimit të projektligjit për Teatrin nga ana e Robert Bitrit në vend të deputetit të opozitës Vangjel Tavo.

“Dua të sqaroj opinionin publik se nga ana e grupit parlamentar të Partisë Socialiste nuk ka pasur asnjë deputet që të ketë votuar në emër të një deputeti tjetër.

Deputetit të pavarur Robert Bitri në vendin që ai voton i është vënë karta e një deputeti tjetër. Kamerat dhe autoritetet ta shqyrtojnë, opozita ka detyrë të japë arsyen e vërtetë të bojkotimit të kësaj seance.”, tha Balla.

Pak ditë më parë,  deputeti i LSI Vangjel Tavo tha se të enjten nuk ka qenë në Kuvend për arsye shëndetësore, ndërsa dikush tjetër ka votuar me kartën e tij të deputetit.

“Nuk kam qenë në Parlament. Nuk e di çfarë ka ndodhur!! Kartat e votimit janë në tavolinën e çdo deputeti ne Kuvend. Nuk e di kush ka votuar në emrin tim.”, janë fjalët e Tavos. Më vonë rezultoi se ai që kishte votuar me kartën e Tavos ishte Robert Bitri.

Ditën e sotme opozita vendosi të bojkonte seancën plenare ku ishte parashikuar votimi i ligjit për Magjistraturën.