Maxhoranca voton e vetme Aktin Normativ, ngec sërish ligji për statusin e prokurorëve dhe gjyqtarëve dhe…

Maxhoranca pas diskutimeve që ka zhvilluar në Kuvend pa praninë e opozitës, ka miratuar Akt Normativ nr. 1, datë 26.7.2018, “Për disa ndryshime në ligjin nr. 109/2017, “Për buxhetin e vitit 2018”, të propozuar nga Ministri i Ekonomisë dhe Financave Arben Ahmetaj.

Për aktin normativ kanë qenë 78 vota pro asnjë kundër dhe asnjë abstenim. Ndërkohë që ligjet që kërkonin një shumicë të cilësuar nuk janë votuar

Sot në rend dite ishin dy ligje të mbartura nga sesioni parlamentar i kaluar dhe kërkonin 84 vota , që maxhoranca nuk i ka dot e vetme.

Projektligji “Për disa shtesa dhe ndryshime në ligjin nr. 96/2016 “Për statusin e gjyqtarëve dhe prokurorëve në Republikën e Shqipërisë” (Neni 81/ 2 i Kushtetutës dhe nenet 73-77, Rregullore, votim me shumicë prej 3/5 e të gjithë anëtarëve të Kuvendit)

Projektligji “Për një ndryshim dhe shtesë në ligjin nr. 8378, datë 22.7.1998 “Kodi Rrugor i Republikës së Shqipërisë” të ndryshuar

Kuvendi nis seancën, mungon opozita. Sot votohet shpërblimi i pensionistëve

Kuvendi do të votojë sot Aktin Normativ që përcakton edhe shpërblimin prej 5 mijë lekësh të rinj për pensionistët dhe familjet në nevojë në fund të vitit. Qeveria ka përcaktuar në buxhet shumën prej 3.3 miliardë lekësh në funksion të paketës së solidaritetit, nga e cila do të përfitojnë jo vetëm pensionistët, por edhe familjet në nevojë.

Seanca ka nisur pa pranine e opozites, ashtu si ishte njoftuar. Fjalen nga foltorja e ka marre ministri i Ekonomise dhe Financave, Arben Ahmetaj, i cili po prezanton Aktin Normativ, qe pritet te votohet sot, pasi ky votim kërkon shumicë të thjeshtë.

Në Kuvend në rendin e ditës janë dhe dy projektligje të mbartura nga sesioni i kaluar siç është ai për shkollën e Magjistraturës dhe Kodi Rrugor i Republikës së Shqipërisë. Këto dy votime kërkojnë dhe votat e opozitës, pasi nevojiten të paktën 84 vota për to.

SHPËRBLIMI

Ministri i Financave Arben Ahmetaj deklaroi dy ditë më parë, se duke marrë parasysh shpërblimin e fundvitit, por edhe indeksimin që iu bë pensioneve në maj, rritja e pensioneve kap shifrën e 5%.

“Këto janë në funksion të bonusit për të kapur atë shifrën prej 50 mijë lekësh në fund të vitit. Për të mos e quajtur atë, siç e quajnë ‘kokoshi një thelë’. Po buxheti është vëmendje ndaj atyre pensionistëve. Janë 50 mijë lekë. T’ju bëj një llogari të shkurtër, 3.3 miliardë është 33 milionë dollarë shto këtu 16 milionë dollarë që ishte indeksimi në maj. U bë në llogarinë e pensionistëve plus 50 milionë dollarë në vit. Se nuk duhet ta harrojmë këtë, që nëse i referohemi totalit të pensioneve që shkon 1.2 minus statuset, i bie që çdo vit pensionistëve u rriten pensionet me një 5%. Nuk është shumë, sigurisht, por e mund inflacionin. Ku inflacioni në fund të vitit do jetë rreth 2%”, sqaroi Ahmetaj.

Ministri i Financave kujtoi se qeveria “Rama” ka pasur gjithmonë në konsideratë shpërblimin e pensionistëve dhe shtresave në nevojë, ndërkohë që demokratët këto shpërblime i kanë dhënë vetëm gjatë viteve elektorale. Sipas kreut të Financave, PD në 8 vitet e qeverisjes së saj dha në total një shpërblim prej 10.5 miliardë lekësh, ndërkohë që PS vetëm në 4 vitet e para të qeverisjes ka dhënë 11.3 miliardë lekë.

“Kemi bërë debat se sa i kemi mbështetur pensionistët dhe familjet në nevojë me atë që ne i referohemi si paketa e solidaritetit. Kam bërë një krahasim mes qeverisjes 8-vjeçare të PDsë dhe 4 vjeçare të PS-së. Totali në 8 vite i qeverisjes së PD-së ka qenë 10.5 miliardë lekë. Po ta shikoni profilin e dhënies së bonusit, gjatë qeverisë së tyre është njëherë në dy vite, gjatë viteve elektorale. Ndërsa në 4 vite, PS ka dhënë 11.3 miliardë lekë. Ne kemi dhënë 10% më shumë në 4 vite se sa ata kanë dhënë në 8 vite. Mënyra se si ne e ofrojmë paketën e solidaritetit nuk ka lidhje fare me vitet elektorale. Kjo mbyll atë debatin se kush ka dhënë më shumë para”, sqaroi Ahmetaj.

LIGJET PËR VOTIM NË KUVEND

VOTOHET SOT NË KUVEND
Akt Normativ nr. 1, datë 26.7.2018, “Për disa ndryshime në ligjin nr. 109/2017, “Për buxhetin e vitit 2018”

LIGJE TË MBARTURA PËR VOTIM QË KËRKOJNË 84 VOTA
Projektligji “Për disa shtesa dhe ndryshime në ligjin nr. 96/2016 “Për statusin e gjyqtarëve dhe prokurorëve në Republikën e Shqipërisë” (Neni 81/ 2 i Kushtetutës dhe nenet 73-77, Rregullore, votim me shumicë prej 3/5 e të gjithë anëtarëve të Kuvendit)

Projektligji “Për një ndryshim dhe shtesë në ligjin nr. 8378, datë 22.7.1998 “Kodi Rrugor i Republikës së Shqipërisë” të ndryshuar