Parlamenti do kthehet në normalitet kur të fillojë komisioni hetimor për çështjen “McGonigal”

Rama s’mund ta blejë kurrë Ilir Metën dhe Sali Berishën

Partia e lirisë ka mbledhur sot Komitetin Drejtues Kombëtar.

Në fjalën e tij kryetari Ilir Meta tha se kryeministri i vendit Edi Rama mund të ketë të ardhura për të korruptuar gjithkënd, por se atë dhe kryedemokratin Sali Berisha nuk mund t’i blejë dot.

“Mund të ketë lekë sa të dojë por Ilir Metën e Sali Berishën nuk i blen dot. I bëj thirrje socialistëve ta largojnë sa më shpejt që të mos përfundojë si Pasoku. Asgjë nuk do ta shpëtojë nga ndëshkimi.
Çon IKMT dhe policinë në kundërshtim me ligjin në biznesin e Agron Shehaj. Sepse është në terrorin e asaj që ka mbjellë e që do ta vjellë. Del e deklaron drejtori i tij i papërgjegjshëm që as Presidenca nuk i ka letrat në rregull. Deri në ’90 edhe fishekët kanë qenë me inventar. Por pse e thonë këtë? Sepse duan të krijojnë pasiguri për pronën në çdo qytetar.

Besoj se e dëgjuar edhe raportin e fundit për IKMT e famshme. Të gjithë ata do përgjigjen para ligjit, të tërë ata janë në monitorime nesër nuk ka justifikim se kështu na tha ai i gjati, që së shpejti do jetë më i shkurtri, një tartabiq.
Shkruajnë mediat botërore se si krimi kontrollon policinë. Kanë kudo kamera kontrollojnë bizneset e vënë gjoba, kontrollojnë jetën e qyteteve tona”, deklaroi Meta.

Kreu i Partisë së Lirisë Ilir Meta deklaroi sot se banda e rilindjes dhe Edi Rama do shporret dhe se parlamenti do kthehet në normalitet kur të fillojë komisioni hetimor për çështjen “McGonigal”.

Meta theksoi se llogaridhënia, transparenca është detyrë e pashmangshme dhe se përpjekja e tij për t’iu shmangur hetimit nga parlamenti është e pashpresë.

“Ndalove një nënë 84 vjeç nga Narta pse kishte ndërtuar pa leje një kotec, ndërkohë që kullat e përbindshme kanë shkatërruar totalisht kryeqytetin tonë. Gjysma e tyre pa leje, por me bekimin e Edi Ramës dhe për llogari dhe të xhepit të tij dhe të bandës që nuk njeh ligj, interes publik, plan urbanistik. Ai ka refuzuar haptas dhe në mënyrë antikushtetuese llogaridhënien në parlament. Ai kujton se kushtetuta është një copë letër, se opozita është si ai karafili që e blinte sa herë të donte.
Ai është në terror të skandaleve që nuk i mbulon dot, që i kanë nisur dhe do i shpërthejnë dhe socialistët e ndershëm do ta shpërbëjnë. Është terrori i skandaleve që do të marrë me vete bandën e rilindjes. Është i pashpresë, asnjë socialist i ndershëm nuk do hiqet nga asnjë bashki vendit, ata që janë për intimidime, patronazhishtë, ata nuk i duhen as dreqit.
Asnjë socialist i ndershëm, asnjë me integritet që bën punën e tij. Kjo histori do të marrë fund njëherë e përgjithmonë. Do shporret Edi Rama dhe banda e rilindjes. Do të marrë fund persekutimi për bindje politike. Modeli ynë është transparent dhe gjithëpërfshirës. Çdo taksë do jetë në monitorimin e qytetarëve, të taksapaguesve. Përpjekja e tij për t’iu shmangur hetimit nga parlamenti është e pashpresë. Ka delegjitimuar veten e tij, ka marrë përsipër të fshihet pas fustanit të disa grave, por nëse Amerika është ngritur në këmbë për një drejtor të korruptuar dhe bën komision hetimor në kongres, senat, pa asnjë diskutim parlamenti do kthehet në normalitet kur të fillojë komisioni hetimor për këtë çështje. Kur qenka i pastër, i ndershëm pse ka frikë? E mbani mend kur më thërriste Ulësiu mua në Kuvend? Më thoshin këshilltarët nuk do shkosh se komisioni është i paligjshëm. Unë të mos shkoj atje, mirë dakord Kushtetuta e ligji thotë kështu, po ata qytetarë që thonë pse nuk shkon Presidenti. Do shkoj për interes të tyre. Ta gjykojnë ata. Llogaridhënia, transparenca është detyrë e pashmangshme. Sa më lart pozicioni, aq më shumë e ke për detyrë llogaridhënien para qytetarëve”, tha Meta.