Nëntori i përgjakur: 4 atentate, vrasje e breshëri plumbash në vend

Ky Nëntor nuk do të harrohet lehtë. Ndërsa vendi zakonisht e shfrytëzon këtë periudhë për festa dhe kremtime kombëtare, këtë vit muaji u përshkua nga dhuna dhe atentate që tronditën publikun.

Më 30 nëntor, biznesmeni 43-vjeçar Edmond Hyka, i njohur si Mondi Mëhalla, u qëllua pranë automjetit të tij në karburantin “Xhaxhi Oil” në Elbasan, biznes që ai e menaxhonte edhe në lidhje me kompaninë e taksive “El Taxi”. Autorët e atentatit, duke përdorur një “Audi” të zi, i janë afruar Mëhallës dhe kanë qëlluar disa herë, duke u larguar më pas drejt Librazhdit. Një automjet i djegur, që dyshohet të ketë qenë përdorur nga ekzekutorët, u gjet paraditen e sotme pranë fshatit Mirakë.

Hetimet e para kanë përqendruar vëmendjen tek konflikte tregtare të mundshme të Mëhallës dhe mosmarrëveshjet e tij të mëparshme me individë nga zona e Lezhës. Një prej të dyshuarve është shpallur në kërkim me nofkën “Boli”, ndërsa një bashkëpunëtor tjetër u arrestua për moskallëzim krimi.

Por kjo nuk ishte ngjarja e vetme e tmerrshme e muajit. Seria e atentateve nisi më 1 nëntor në Selenicë, ku Dalan Alliaj u ekzekutua në prag të shtëpisë së tij nga kushëriri i tij, i cili ishte i shpallur në kërkim për një masakër të mëparshme.

Më 11 nëntor, Gilmando Dani dhe shoqëruesi i tij Muçi Shaljani u sulmuan pranë aeroportit të Rinasit. Sulmi i kryer nga autorë të maskuar dhe të veshur si policë përfundoi tragjikisht, duke i marrë jetën Shaljanit katër ditë më vonë.

Më 25 nëntor, Lushnja u trondit nga të shtëna me kallashnikov ndaj automjetit të Julian Sulës, të njohur si “Juli i Pashakos”. Fatmirësisht, nuk pati viktima, por automjeti u braktis dhe iu vu flaka pas largimit të autorëve. Policia hetuan lidhjet e Sulës me grupe kriminale dhe konflikte të mëparshme midis fiseve lokale.

Ky Nëntor, që filloi me vrasje në Selenicë dhe vazhdoi me atentate në Rinas, Lushnjë dhe kulmoi me ekzekutimin e Mëhallës në Elbasan, ka lënë pas një rrëmujë dhe frikë në vend. Autorët mbeten ende të paidentifikuar, ndërsa hetimet pritet të hedhim dritë mbi motivet dhe të ndalojnë përgjegjësit e këtyre ngjarjeve.