Por prokurori ju kundërpërgjigj me një batutë duke shtuar se: “Sokol Bode ka qënë një shef policie në Dhërmi që bënte gardianin për drogën e Habilajve, ka qëndruar në detyrë për tre vite me rradhë, më shumë kohë se sa kam qëndruar në detyrën e drejtuesit të Krimeve të Rënda unë.
“Shqiptarja.com”, sjell pjesërisht debatet dhe batutat mes dy protagonistëve të këtij gjyqi, ku fillimisht e ka marrë fjalën Saimir Tahiri.
Replikat Tahiri-Hajdarmataj
Tahiri: E nderuar zonja gjyqtare, megjithëse unë nuk mund të artikuloj saktë dhe qartë e procedurialisht argumentat, pasi nuk jam në nivelin e një avokati, megjithëse jam me arsim jurist, dua t’ju them se me këtë masë që më keni dhënë si në burg si në arrest shtëpie është njëlloj për mua. Unë burg e quaj, se me këto prova që janë paraqitur nuk e pranoj të qëndroj as në “arrest shtëpie”. Meqënëse vepra penale që më atribuohet nga prokuroria është e rëndë dhe detyrimit parashikon masa ekstreme izolimi, atëherë më vendosni në arrest në burg, pasi masa arrest shtëpie që keni vendosur është e papërshtatshme me akuzat që pretendon prokuroria.Jemi këtu sot në gjykatë për tu njohur me provat e reja të prokurorisë. Unë këto prova i kam ditur. Nëse duhet të mbahem i izoluar për këto prova, atëherë ky qenka standardi? Me këto prova që ka sjellë prokuroria, tregon se ka hetuar pushimet e mia në 2014. Pra jam hetuar si grup i strukturuar miqësor dhe jo si grup i strukturuar kriminal. Plus që dua të shtoj se këto prova janë sjellë në mënyrë dashakeqase dhe jo në mirëbesim siç e ka përcaktuan Gjykata e të Drejtave të Njeriut.E them dashakeqase zonja gjyqtare pasi, dhe mënyra e servirur e dëshmive të dy tregtarëve italianë të pyetur për kostumet dhe byzylyket nuk tregojnë asnjë gjë. Madje dhe Moisi Habilaj i pyetur për këtë fakt, pra byzylykët tregon se i ka blerë për një person tjetër, duke mos dhënë asnjë indicia dyshime. Pastaj çështë kjo që keni evidentuar në vendim, për lënien e mandatit dhe rrezikun me ikjes time dhe fshehjes së drejtësisë, unë në Shqipëri kam qënë, madje dhe kam udhëtuar jashtë shtetit dhe nuk kam ikur as kur kam qënë deputet as kur jam i lirë.Pastaj sot ngeli që të iki dhe ti fshihem drejtësisë, unë po të largohesha, këtë e bëja 8 muaj para, ku nisën hetimet.
Hajdarmataj: Zonja gjyqtare dua tju bëj me dije se ky është një hetim shumë kompleks dhe i vështirë. Hetimi ka hyrë në një fazë deçizive dhe se ne si prokurori kemi për të pyetur dhe disa persona të tjerë, në dobi të këtij hetimi. Para se të jenë provat në tavolinën time dhe para se të vijnë dëshmitarët në prokurori, ato i di të gjitha një ditë para Saimir Tahiri.I hetuari prej nesh, ka aksesh dhe mer vesh një ditë para se kë do thëras unë dëshmitar.Për këtë ne si prokurori kemi prova, që ai ka takuar një nga dëshmitarët që ne kishim thirur në prokurori për të dëshmuar.Dhe një gjë e tillë ka ndodhur me shtetasin Orgest Liperi, i cili është dhe pronari i skafit me të cilin Tahiri dhe Elona Hoxha, kanë udhëtuar në gusht 2014 në Greqi, nga Saranda.
Tahiri: Po e kam takuar personin që ju përmendët dhe skam pasur qëllim ta intimidoj. Po po e kam takuar dhe kam qënë me bashkëshorten, ku i kam kërkuar ndjesë këtij personi për taksiratin që e zuri, dhe që i doli emri në këtë histori me mua, dhe taksirati i tij për tu paraqitur në prokurori. E kam takuar duke bërë një gjest qytetar dhe nëse është e nevojshme, unë do e ribëj sërisht një gjest të tillë, duke i kërkuaj falje jo vetëm atij, por kujdo.
Prokurori Besim Hajdarmataj relaton para gjykatës lidhur me aktivitetin krimian të Sokol Bodes, ish-shefit të postës kufitare Dhërmi,i cili kishte në mbulim zonën ku u ankorua anija Fatima, duke u ngarkuar me drogë dhe jep dia detaje dhe për mos regjistrimin e skafit në portin e Sarandës dhe Triport, si dhe mos rregjistrimin në TIMS të hyrje-daljeve të Habilajve.
Tahiri: Po ç’pun kam unë me këta more, unë kam qënë një ministër që kam shërbyer për gati 3 vite, ç’pun kam unë dhe çfarë përgjegjësia kam unë me shkeljen e detyrës së këtyre policëve që ju po thoni. Ç’farë më lidh mua me këta persona, ku e kam shkelur ligjin unë këtu…unë as i njoh fare këta persona dhe as kam interes ti njoh. Nëse kanë bërë shkelje kapini dhe akuzojini, po unë ç’lidhje kam këtu, çfarë trafiku droge kam bërë unë këtu, se nuk po e marr vesh qëndrimin tuaj me këto prova dhe argumenta.
Hajdarmataj: Sokol Bode ka qënë një shef policie në Dhërmi që bënte gardianin për drogën e Habilajve, ka qëndruar në detyrë për tre vite me rradhë, më shumë kohë se sa kam qëndruar në detyrën e drejtuesit unë
Hajdarmataj: Do konfirmojmë që shumë të dhëna nuk rezultojnë fare në sistemin TIMS sikurse është rasti i Moisi Habilajt. Në TIMS, ka pasur ndërhyrje lidhur me hyrje-daljet jo vetëm të Tahirit, por edhe me personat e tjerë, si është rasti i Moisi Habilaj. Por për këtë do të jap shpjegime të mëvonshme dhe do të zbardhen në fund të hetimit. Në kohën e kthimit, së bashku me skafin me defekt, nuk është regjistruar në portin e Sarandës që ka hyrë Artan Habilaj, me policin dhe mekanikun. Nga Saranda skafi është lënë në Triport e më pas në Durrës. Pas disa ditësh është paraqitur te moli, Moisi Habilaj, dhe të vetmit që i kanë bërë rezistencë kanë qenë punonjësit e molit, që i kanë thënë se nuk mund ta marrë pasi nuk ka dokument. Pavaresisht kësaj, Moisi Habilaj, e ka marrë skafin dhe ka shkuar në Brindizi për ta rregulluar”.
PESHKAREXHA
Si u fik radari i Sazanit në 6 maj 2015 për të kaluar trafikantët
Nga provat që ka paraqitur prokuroria në gjyqin ndaj ish-ministrit të Brendshëm, Saimir Tahiri ka dalë në pah një fakt mjaft i rëndë për influencën që kishin trafikantët në strukturat e shtetit. Në datën 6 maj të vitit 2016 kur një peshkarexhë italiane e ngarkuar me drogën e grupit të Habilajve u nis nga Shqipëria për në Itali radari i ushtrisë u fik për t’u mundësuar kalimin e lirë.
“Nga këqyrja, në datën 6 maj 2015, rezultoi se në orën 01:07, shënimi i njoftimit të marrë nga Q.N.O.D për një mjet që ishte duke u afruar me shpejtësi në drejtim të Himarës, drejt të cilit u dërguan BP-24: në orën 01.15, njoftimi i marrë nga Q.N.O.D për daljen jashtë funksionit të Radarit të Sazanit në orën 01:35 njoftimi i marrë nga BP-06 se objekti ishte peshkarezha “Rozeta 1” që ishte duke u kthyer nga Palermo”, thuhet në dokumentin e prokurorisë. Pra nga ky dokument del qartë se në momentin që anija e trafikantëve të drogës, në këtë rast e bandës së Habilajve, nisej për në Itali, radari si rastësisht dilte jashtë funksionit.
Duhet theksuar se radari që është i vendosur në ishullin e Sazanit nuk varet nga ministria e Brendshme por nga ministria e Mbrojtjes. Implikimi i strukturave të ministrisë së Brendshme në këtë rast dalin tek përfshirja e Sokol Bodes, ish-shefit të kufirit për zonën bregdetare Dhërmi-Himarë. “Sipas të dhënave të përftuara nga regjistri “26/2015 Dhërmi Libër Planizimi të Shërbimit SPK Dhërmi”, këqyrur në datën 9 maja 2018, rezulton planëzimi në shërbim i Sokol Bodes, në funksion të shefit të stacionit, për datën 5 maj 2015 (ditë e martë)”, thuhet në dokument. Sokol Bode është një nga tre oficerët e policisë që janë arratisur pas akuzave të prokurorisë për përfshirje të tyre në trafikun e lëndëve narkotike. Bode është cilësuar nga prokuroria si pjesë e bandës së Habilajve së bashku me ish-drejtorin e policisë së Vlorës Jaert Çela dhe oficerit të policisë Gjergji Kohila.
