A po mbyll SPAK-u dosjen për Oltën dhe Fridën?

Publiku dhe opozita mbetën të habitur sot nga zhvillimet në Këshillin e Legjislacionit. Edi Rama, duket se ka hequr dorë nga përpjekjet për të mbrojtur Olta Xhaçkën. Për dy vite, Partia Demokratike ka kërkuar që të hiqet mandati i saj, duke argumentuar se burri i saj, i shpallur investitor strategjik, është në konflikt interesi. Megjithatë, Partia Socialiste e ka refuzuar kërkesën, madje ka shkuar deri në interpretimin e vendimeve të Gjykatës Kushtetuese.

Pas pushimeve verore, socialistët janë kthyer me një mendje të re. Këshilli i Legjislacionit ka dhënë miratimin për të dërguar në seancë plenare vendimin e Gjykatës Kushtetuese në lidhje me mandatin e deputetes socialiste.

Vetëm disa javë më parë, ish-kreu i grupit socialist, Bledi Çuçi, njoftoi publikisht se vendimi do të “ankimohej” në Komisionin e Venecias. Ai e quajti vendimin e Gjykatës Kushtetuese si anti-kushtetues dhe deklaroi se deputetët janë të lirë të votojnë sipas ndërgjegjes së tyre. Por duket se diçka ka ndryshuar.

Pyetja që ngrihet është: Pse Rama vendosi të lëshojë Olta Xhaçkën?

Ka sinjale që SPAK-u mund të jetë futur në lojë. Ish-ministrja e Mbrojtjes është nën hetim për afera me pronat e ushtrisë, dhe sinjalet tregojnë se dosja po mbyllet. Nuk është çudi që ajo të merret nën akuzë së shpejti. Rama, siç e ka zakon, i largon ata që kap SPAK, duke tentuar të pastrojë imazhin e tij. Në këtë rast, duket se e ka dorëzuar Xhaçkën në duart e Prokurorisë së Posaçme, dhe nuk është e largët dita kur ajo mund të merret e pandehur.

Ky veprim është gjithashtu një sinjal për të tjerët. Zërat thonë se në vjeshtë mund të nisë një aksion tjetër i SPAK në radhët e mazhorancës, dhe kryeministri po u dërgon sinjalet që të mbyllin vetë hesapet me drejtësinë.

Ndërkohë, pritet që të përfundojë hetimi i dosjes IPARD, ku Frida Krifca është një nga të rrezikuarat. Po ashtu, ka edhe shumë dosje tenderësh që mund të tronditin mazhorancën.