Rama: Meta shkroi fatin për të humbur të drejtën për të qëndruar në Presidencë

Kryeministri Edi Rama, ditën  e sotme, ka paralajmëruar largimin e Presidentit Ilir Meta, pas vendimit për shtyrjen e datës së zgjedhjeve.

Nga Burreli, Rama tha se Presidenti Meta, sipas tij, e ka shkruar vetë fatin e tij dhe se me vendimin e djeshëm, e ka humbur të drejtën që të qëndrojë më në atë zyrë.

Kryeministri e cilësoi vendimin e Metës si “vetëvrasje politike” dhe turp.

“Qeverinë nuk e heq dot asgjë veç votës së popullit. Dje, sipas parashikimeve të mia u shfaq shpëtimtar i atyre që kanë mbetur në rrugë Presidenti i Republikës, duke paralajmëruar një akt që politikisht është vetëvrasje, moralisht është turp si s’ka më turp dhe ligjërisht është nul. Mos u çudisni nëse ju them se nga fronti i shpëtimtarit të opozitës nuk kemi parë gjë akoma, nuk është çmenduria e fundit, do të ketë dhe të tjera. Por do apo nuk do Saliu, do apo nuk do Lulzim, apo filxhani, zgjedhjet do të mbahen në 30 qershor. Dje Ilir Meta ka shkruar fatin e tij si President që e ka humbur të drejtën të qëndrojë në atë zyrë. Të gjithë ata që udhëheqin lëvizjen “Rama ik”, do të ikin të gjithë vetë. Me logjikën e djeshme, Ilir Meta mund të bëjë dhe një dekret që t’i shpalli luftë Amerikës, por është e qartë që ne nuk mund ta pranojmë”, tha Rama.