Ndërkohë që qeveria shqiptare shpërndan miliona euro në tendera luksi dhe projekte me dyshim publik, shqiptarët e zakonshëm përballen me realitetin e hidhur: shteti social në Shqipëri ka dështuar.

Sipas Bankës Botërore dhe Institutit të Vjenës, Shqipëria renditet e fundit në rajon për mbështetjen sociale që i ofrohet familjeve në nevojë. Ndihma mujore mesatare është vetëm 70 euro, shumë herë më pak se në vendet fqinjë:

• Federata e Bosnjë-Hercegovinës – 304 euro
• Serbia – 282 euro
• Mali i Zi – 267 euro
• Maqedonia e Veriut – 207 euro
• Kosova – 191 euro
• Shqipëria – 70 euro

Kontrasti i hidhur i prioriteteve

Teksa familjet e varfra mbijetojnë me ndihma minimale, qeveria vazhdon të tenderojë:

Dy satelitë me kosto dhjetëra milionë euro. Fushën e garave në Elbasan, një projekt pa ndikim social real.

Inceneratorët fantazmë, ku janë zhdukur qindra milionë euro.

Koncesionet e pakontrolluara, që u shërbejnë vetëm klientelës politike.

Dhe, më skandalozja, një kopësht në oborrin e Kryeministrit, me kosto marramendëse prej 4 milionë euro.

Shqipëria pa mburojë sociale

Ky kontrast tregon një realitet dramatik: shteti nuk është i fokusuar në mirëqenien e qytetarëve, por në projekte luksi dhe tendera klientelistë. Ndërsa fëmijët shqiptarë ushqehen me më pak se 2 euro në ditë nga ndihma sociale, qeveria justifikon shpenzime të pafundme për projekte që nuk përkthehen në asnjë përfitim për shoqërinë.

Shqipëria është sot shembulli më i qartë se si një shtet social mund të shndërrohet në një shtet fasadë.