Shqiptarët kanë 7 miliardë euro kursime nëpër banka

E keqja të gjen ku të jesh futur; por edhe e mira ama!

Shqiptarët, me një guxim drithërues
kanë arritur të hedhin rreth 7 miliardë euro kursime nëpër banka; por, nuk besoj se kanë hequr dorë nga zakoni i qypave nën tokë – kush e di sesa miliarda euro të tjera dergjen si gurë në fund të detit, nën dyshek apo nën jastek – të gjitha të hequra mënjanë për një Ditë të Keqe që do vijë – jo se duan të kryejnë ndonjë investim tjetër pas dy apo katër apo 10 vjetësh – thjesht që të jenë më të sigurtë nga e keqja që do i vijë nga e ardhmja. Pra, jo për t’u përmirësuar por për të ruajtur statuskuonë. Ideja – E ardhmja ka të keqen brenda, ajo do na sjellë të keqen, prandaj të kemi ca lekë që t’ja japim, që ajo mos jetë aq e keqe me ne. Lekët e kursyera si haraç për të Keqen. Në vend që të Ardhmen ta kishim inspirim, dëshirë, meziçpritje për ta jetuar, për ta mirëseardhur. Identifikimi i të keqes me të ardhmen, na ka hequr gëzimin e jetës. Miliardat e ngurtësuara nuk do na kthejnë kurrë atë. Investoni njerëz, mos shihni televizor! Jo për gjë, tani keni edhe Bursë.