Ka raste kur një sondazh nuk mat thjesht opinionin publik. Mat distancën mes propagandës dhe realitetit.

Tre gjetje të Institutit Republikan Ndërkombëtar (IRI) janë të mjaftueshme për të kuptuar se ku ndodhet sot Shqipëria.

E para, 96% e shqiptarëve mbështesin integrimin në Bashkimin Europian. Kjo tregon se orientimi strategjik i vendit nuk është në diskutim. Shqiptarët e dinë se e ardhmja është në Perëndim dhe jo diku tjetër.  

E dyta, problemet ekonomike mbeten shqetësimi kryesor i qytetarëve. Inflacioni, kostoja e jetesës, pagat, emigracioni dhe mungesa e perspektivës dominojnë mbi çdo slogan politik. Qytetarët nuk kërkojnë spektakël; kërkojnë mirëqenie.  

E treta, shqiptarët kërkojnë institucione funksionale dhe sundim të ligjit si parakusht për zhvillim. Nuk mjafton retorika europiane nëse korrupsioni, pandëshkueshmëria dhe kapja e shtetit vazhdojnë të jenë pjesë e përditshmërisë.  

Këto tre të dhëna krijojnë një paradoks të madh.

Shqiptarët janë ndër popujt më proeuropianë në kontinent, por njëkohësisht janë të zhgënjyer nga mënyra se si qeveriset vendi. Ata nuk po kërkojnë ndryshim të kursit gjeopolitik. Po kërkojnë që standardet europiane të mos mbeten vetëm në konferenca shtypi.

Europa për qytetarin nuk është një flamur me yje. Është një gjykatë që nuk blihet. Një tender që nuk është i paracaktuar. Një administratë që nuk funksionon me patronazhistë. Një ekonomi ku puna shpërblehet dhe ku të rinjtë nuk e shohin emigrimin si të vetmen rrugë.

Nëse politika lexon vetëm shifrën 96%, do të vazhdojë të vetëmashtrohet se shqiptarët janë të kënaqur.

Nëse lexon të tre faktet bashkë, mesazhi është krejt tjetër.

Shqiptarët kërkojnë të  votojnë për një shtet që ende nuk e kanë.