Tjetër protestë për vrasjen e 14-vjeçarit Martin Cani

Aktivistët dhe qytetarët kanë njoftuar një tjetër protestë për vrasjen tragjike të 14-vjeçarit Martin Cani, që ndodhi pranë shkollës 9-vjeçare “Fan Noli”. Protesta e tretë është planifikuar të mbahet të martën, më 3 dhjetor, duke nisur në orën 18:00. Marshimi do të fillojë nga shkolla “Fan Noli” dhe do të përfundojë te Ministria e Arsimit.

Në dy protestat e mëparshme, prindërit dhe shoqëria civile kanë bërë thirrje për masa të rrepta sigurie në shkolla dhe kanë kërkuar dorëheqjen e ministres së Arsimit, Ogerta Manastirliu.

Tragjedia ndodhi disa ditë më parë, kur Martin Cani humbi jetën në një incident të rëndë mes bashkëmoshatarëve të tij, ku mbeti i plagosur edhe një tjetër nxënës. Ngjarja ka ngjallur shqetësime të thella për sigurinë dhe dhunën në shkolla, duke çuar në reagime të forta nga komuniteti.

Organizatorët e protestës së ardhshme bëjnë thirrje për pjesëmarrje të gjerë për të kërkuar drejtësi për Martin Canin dhe për të siguruar një mjedis të sigurt për fëmijët.