Trump: Do të tërhiqemi nga 66 organizata ndërkombëtare

Presidenti i Shteteve të Bashkuara, Donald Trump, ka urdhëruar tërheqjen e SHBA-së nga 66 organizata ndërkombëtare, duke argumentuar se ato nuk u shërbejnë më interesave kombëtare të vendit.

Vendimi është formalizuar përmes një memorandumi presidencial, i cili u është dërguar departamenteve dhe agjencive federale, duke i udhëzuar të ndërpresin pjesëmarrjen dhe financimin e 31 entiteteve të Kombeve të Bashkuara dhe 35 organizatave të tjera ndërkombëtare, jo pjesë e OKB-së, “sa më shpejt të jetë e mundur”.

Sipas një deklarate të Shtëpisë së Bardhë, organizatat e përfshira veprojnë në kundërshtim me interesat kombëtare të SHBA-së, duke cenuar sigurinë, prosperitetin ekonomik dhe sovranitetin amerikan. Një pjesë e konsiderueshme e tyre janë aktive në fusha si politikat e mjedisit dhe klimës apo barazia gjinore.

“Presidenti Trump po i jep fund pjesëmarrjes së SHBA-së në organizata ndërkombëtare që minojnë pavarësinë e Amerikës dhe shpërdorojnë paratë e taksapaguesve në axhenda joefektive ose armiqësore”, thuhet në deklaratën e Shtëpisë së Bardhë.

Edhe Sekretari i Shtetit, Marco Rubio, reagoi përmes një postimi në rrjetin social X, ku bëri të ditur se Uashingtoni po tërhiqet nga ato që ai i cilësoi si “organizata ndërkombëtare anti-amerikane, të padobishme ose shpërdoruese”.

Rubio shtoi se procesi i shqyrtimit të marrëdhënieve me organizata të tjera ndërkombëtare është ende në vijim.

Që prej rikthimit në detyrë, presidenti Trump ka ndërmarrë një sërë hapash për të reduktuar angazhimin e SHBA-së në struktura shumëpalëshe, përfshirë Organizatën Botërore të Shëndetësisë (OBSH) dhe UNESCO-n, agjencinë kulturore të Kombeve të Bashkuara.