Nëse bie Tahiri, bie i gjithë sistemi kriminalo-kurruptiv që ka ndërtuar Edi Rama

Nëse bie Tahiri, bie i gjithë sistemi kriminalo-kurruptiv që ka ndërtuar Edi Rama. Ndaj Edi Rama dhe makina e tij gjigande e propagandës është investuar për të sulmuar këdo, qoftë edhe socialistë, mjaft që të harrohet apo relativizohet Tahiri.

Edi Rama do që shqiptarët të mendojnë se Adriatik Llalla është më i kriminalizuar dhe më i korruptuar se Tahiri, i cili ka hyrë deri në Shtëpinë e Bardhë ndërkohë që drejtonte trafikun e drogës; do që shqiptarët të besojnë se ish-drejtorët e rrugëve janë peshq të medhenj dhe nuk ka nevojë për peshkun Tahiri; do që shqiptarët të besojnë se meqë ka rënë mbjellja e kanabisit, problemet që mund të ketë krijuar Tahiri janë zgjidhur ndaj çeshtja Tahiri nuk ka më rëndësi, pavarësisht se paratë e drogës po pushtojnë çdo qelizë të ekonomisë dhe Shqipëria është bërë autostradë e heroinës dhe kokainës.

Ata që duan të rrezojnë Ramën, duhet t’i mbajnë sytë tek Tahiri. Duhet ta bëjnë Tahirin etalon të matjes së çdo gjëje: reforma në drejtësi ka dështuar, nëse shpëton Tahiri; lufta kundër krimit ka dështuar, nëse mbetet i lirë Tahiri; lufta kundër korrupsionit ka dështuar, nëse nuk e gjen gjë Tahirin.