‘Ciao Roaming’: shqiptarët drejt telefonatave falas në BE nga 2026

Shqipëria është një hap më pranë heqjes së tarifave roaming me vendet e Bashkimit Europian. Ministria e Infrastrukturës dhe Energjisë ka hedhur për konsultim publik ndryshime në ligjin “Për Komunikimet Elektronike”, të cilat synojnë përafrimin e plotë të kuadrit ligjor shqiptar me standardet e BE-së për skemën “Roaming Like At Home”.

Sipas propozimeve, synimi është që deri në vitin 2026, qytetarët shqiptarë të mund të përdorin telefonat e tyre në vendet e Bashkimit Europian pa pagesa shtesë për thirrje, mesazhe apo internet, ashtu siç ndodh brenda territorit të Shqipërisë. I njëjti parim do të zbatohet edhe për shtetasit e BE-së që vizitojnë vendin tonë.

Ndryshimet ligjore parashikojnë gjithashtu reduktimin e kostove teknike mes operatorëve celularë, me qëllim që përfitimet të reflektohen realisht tek përdoruesit fundorë. Një element i ri është edhe parashikimi i masave ndëshkuese, përfshirë gjoba, për operatorët që nuk do të respektojnë rregullat e reja të roaming-ut.

Nisma vlerësohet si një hap i rëndësishëm drejt integrimit të Shqipërisë në tregun unik digjital europian, duke lehtësuar lëvizjen e lirë të qytetarëve dhe duke krijuar kushte më të favorshme për zhvillimin e biznesit dhe komunikimin ndërkufitar.

Më herët, edhe presidentja e Komisionit Europian, Ursula von der Leyen, e ka cilësuar heqjen e tarifave roaming për telefoninë celulare si një proces me rëndësi të veçantë në rrugën e afrimit të Shqipërisë me Bashkimin Europian.