I dha Trump-it Nobelin, çfarë mori në këmbim liderja e opozitës Machado

Udhëheqësja e opozitës venezueliane, María Corina Machado, u paraqit të enjten në Shtëpinë e Bardhë me një gjest simbolik që ka ngjallur reagime të forta politike dhe mediatike: ajo i dorëzoi presidentit amerikan Donald Trump medaljen e Çmimit Nobel për Paqen, të cilin e kishte fituar një vit më parë për angazhimin e saj në mbrojtje të demokracisë në Venezuelë.

Machado, e njohur si një nga kritiket më të ashpra të ish-presidentit Nicolás Maduro, duket se shpresonte se ky veprim do t’i siguronte asaj diçka më shumë sesa simbolikë – konkretisht, një mbështetje më të fortë të SHBA-së në betejën për drejtimin e Venezuelës pas rënies së regjimit të Maduros.

Megjithatë, sipas CNN, ky gjest nuk ka prodhuar ende efektin e pritur. Edhe pse u fotografua në Shtëpinë e Bardhë pranë Trumpit dhe më pas duke u larguar me një çantë dhuratë me markën e presidentit amerikan, mbetet e paqartë se çfarë fitoreje politike konkrete ka arritur Machado nga ky takim.

Një fotografi e publikuar nga Shtëpia e Bardhë tregon Trumpin dhe Machadon pranë një pllake të madhe me kornizë ari, e cila përmbante medaljen dhe një dedikim ku thuhej se çmimi i jepej Trumpit “si një simbol personal mirënjohjeje në emër të popullit venezuelian, në njohje të veprimit të tij parimor dhe vendimtar për të siguruar një Venezuelë të lirë”.

Vetë Trump reagoi në rrjetin e tij Truth Social, duke shkruar:
“Maria më dha Çmimin Nobel për Paqen për punën që kam bërë. Një gjest kaq i mrekullueshëm respekti të ndërsjellë”.

Por reagimi i Qendrës Nobel për Paqen në Oslo ishte i menjëhershëm. Komiteti theksoi se medaljet mund të kalojnë nga një pronar te tjetri, por titulli i laureatit të Çmimit Nobel për Paqen nuk mund të transferohet. “Titulli mbetet gjithmonë i personit që e ka fituar”, u shpreh komiteti në rrjetin X.

Ndërkohë, Machado e cilësoi takimin me Trump si “historik” dhe “të jashtëzakonshëm”, duke deklaruar se administrata amerikane e kupton nevojën për rindërtimin e institucioneve demokratike në Venezuelë, mbrojtjen e të drejtave të njeriut dhe garantimin e lirisë së fjalës. Ajo foli gjithashtu për domosdoshmërinë e një procesi të ri zgjedhor të besueshëm, për të nxitur kthimin e miliona venezuelianëve të larguar nga vendi.

Machado këmbënguli se Venezuela tashmë ka një president të zgjedhur, duke iu referuar Edmundo Gonzálezit, kandidatit të opozitës që ishte njohur më herët nga SHBA pas zgjedhjeve të kontestuara të vitit 2024. Në atë proces, autoritetet zgjedhore të kontrolluara nga qeveria shpallën fitues Maduron, çka u shoqërua me akuza të forta për manipulim.

Megjithatë, pas kapjes së papritur të Maduros nga forcat speciale amerikane, Trump nuk u rreshtua përkrah opozitës, por mbështeti Delcy Rodríguez, ish-nënpresidenten e regjimit të Maduros, duke e emëruar presidente të përkohshme. Ky vendim tronditi shumë figura anti-Maduro dhe krijoi paqartësi në radhët e opozitës.

Administrata Trump ka sinjalizuar disa herë se e sheh Rodríguezin si një alternativë më pragmatike dhe të qëndrueshme për bashkëpunim. Kjo linjë u konfirmua edhe nga sekretarja e shtypit e Shtëpisë së Bardhë, Karoline Leavitt, e cila deklaroi se vlerësimi personal i Trump për Machadon mbetet pozitiv, por se ai nuk beson se ajo ka mbështetjen e nevojshme për të udhëhequr Venezuelën në këtë moment.

“Në këtë fazë, qëndrimi i presidentit për këtë çështje nuk ka ndryshuar”, u shpreh Leavitt.

Pavarësisht toneve optimiste të Machado-s, mbetet e paqartë nëse gjesti i saj simbolik do të përkthehet në mbështetje reale politike, apo do të mbetet thjesht një episod i fortë mediatik.