Vrasja në Vlorë/ Flet djali i anëtares së KLP: Më shau

Djali i anëtares së KLP, Rei Meta, ka dhënë dëshminë e tij lidhur me vrasjen që kreu ditën e djeshme në Vlorë.

Sipas burimeve të policisë Meta ka thënë se nuk ka patur motiv për ta vrarë teksa në qendrën e internetit janë takuar rastësisht sipas tij pasi të dy do të printonin disa dokumente. I riu kallëzon gjithashtu se viktima, Armando Meshau, e ka sharë i pari dhe e ka goditur ai kur konflikti është përshkallëzuar.

Në lidhje me krimin, rreth 10 persona janë marrë në pyetje përgjatë 24 orëve nga policia e Vlorës. Personat në fjalë kanë qenë kryesisht dëshmitarë okular në vendin e ngjarjes të cilët kanë parë konfliktin, por edhe familjarë si të viktimës dhe autorit.
Dëshmitarët në polici kanë treguar rrjedhën e ngjarjes në fjalë, sherrin si nisi dhe si u zhvillua teksa familjarët kanë dëshmuar në polici në lidhje me faktin e dijenisë së tyre për konfliktin për një apartament.
Deri më tani të gjithë shprehen se ishte vetëm një moment gjaknxehtësie nga të dy dhe Rei e goditi me grushte, ndërsa Armando Meshau u shemb menjëherë në tokë.