Ku shkuan dy satelitët shqiptarë “Albania 1” dhe “Albania 2”

Sytki Spici

Nëse Edi Rama nuk do kishte lëshuar dy satelitë në orbitë, ndoshta FBI do ishte ende duke u përpjekur të gjejë një vend për të parë nga qielli.

Imagjinoni FBI-në, që në vend të vëzhgimit të ndonjë superkomploti ndërkombëtar, duhet të merret me një satelit shqiptar që fluturon sikur po kërkon Bigfoot-in. Po kush e di, ndoshta satelitët po i spiunojnë UFO-t, që për FBI-në është një punë shumë më serioze!

Kur Rama lëshoi dy satelitët, nuk tha asgjë se kush po i financon. Amerika mike apo xhepat e shqiptarëve? Epo, kush do të kishte menduar që do të bëheshim një superfuqi hapësinore, duke shitur domate e qepë në treg? Dhe mediat tona, si gjithmonë, janë aq të zëna duke ndjekur gjurmët e UFO-ve saqë askush nuk ka pyetur ku janë fshehur paratë për këta satelitë misteriozë.

Dhe e dini çfarë? Tani edhe SPAK-u është bërë pjesë e trekëndëshit Edi Rama-Dy Satelitët-Paratë, por me një brinjë të thyer në krahëror. Satelitët u ngritën lart, ndërsa paratë ranë poshtë, diku në xhepat e dikujt. Por mos u shqetësoni, se për këtë kemi gjithmonë një shpjegim teknik që askush nuk e kupton, ashtu si frekuencat që mafia paska frekuentuar.

Në fund të ditës, mund të pyesim edhe fshatarët që dinë çdo gjë për narkoshtetin: “Hej, a e dini ju ku kanë shkuar satelitët e Edi Ramës?” Ata me siguri do të thonë: “Jo, por e dimë që inceneratorët dhe anijet energjetike ende s’janë në funksion. Dhe sa për FBI-në? Epo, le të vazhdojë kërkimet për UFO-t, ndërsa ne vazhdojmë të pyesim: Sa kanë kushtuar këta dy satelitë fantazmë?”